@ ఏళ్లతరబడిగా రెడ్‌క్రాస్‌ సొసైటీ లో తిష్ట వేసిన పాలక కమిటీకి ఈసారి భంగపాటు తప్పలేదు. ఇంతకాలం ఏకగ్రీవాలతో తమ ఆధిపత్యం చెలాయించిన కమిటీ మొదటి సారి జరిగిన ఎన్నికల్లో పరాజయం పలకరించింది.
తెరవెనుక వ్యూహాత్మకంగా పావులు కదిపిన బీజేపీ అనూహ్యంగా పాగా వేసింది.15 స్థానాలకు గాను 11 స్థానాలను గెలుచుకుంది. పాత కమిటీ నుంచి నలుగురు ఎన్నికయ్యారు. బీజేపీ ముద్ర ఉన్న ఇందూర్‌ సేవా సమితి ఎట్టకేలకు రెడ్ క్రాస్ పాలక వర్గం పగ్గాలు దక్కించుకుంది. 9,826 మంది సభ్యులున్న సొసైటీలో ఆదివారం ఉదయం 8 గంటల నుంచి మధ్యాహ్నం 3 గంటల వరకు పోలింగ్‌ జరిగింది.
మొత్తం 1,522 మంది మాత్రమే ఓటు హక్కును వినియోగించుకున్నారు. అనంతరం ప్రారంభమైన ఓట్ల లెక్కింపులో కొత్త ప్యానల్‌ అభ్యర్థులు మెజారిటీ స్థానాల్లో ఆధిక్యం సాధించారు. ఫలితాలతో రెడ్‌క్రాస్‌ సొసైటీలో కొత్త నాయకత్వానికి మార్గం సుగమమైంది. రెడ్‌క్రాస్‌ వంటి స్వచ్ఛంద సేవా సంస్థల్లో సాధారణంగా ఏకాభిప్రాయంతో కమిటీని ఎన్నుకునే ఆనవాయితీ కొనసాగుతూ వచ్చింది. అయితే ఈసారి పరిస్థితి పూర్తిగా మారింది.
పాత కమిటీకి ప్రత్యామ్నాయంగా కొత్త ప్యానల్‌ ఎన్నికల బరిలోకి రావడంతో పోటీ అనివార్యమైంది. ఎన్నికలకు కొద్దిరోజుల ముందు ఏర్పడిన కొత్త బృందం 15 స్థానాల్లో అభ్యర్థులను నిలబెట్టడం సొసైటీ సభ్యుల్లో చర్చకు దారితీసింది. ఇప్పటివరకు పెద్దగా ఎన్నికల పోటీని చూడని రెడ్‌క్రాస్‌లో ఈసారి ప్రచారం హోరెత్తింది.
సభ్యులను నేరుగా కలవడంతో పాటు సోషల్‌ మీడియా, డిజిటల్‌ మాధ్యమాల ద్వారా అభ్యర్థులు తమ వాదనలను ముందుకు తీసుకెళ్లారు. దీంతో ఎన్నికల వ్యవహారం సాధారణ కమిటీ ఎంపికను దాటి విస్తృత చర్చకు దారితీసింది. కొత్త ప్యానల్‌ విజయంలో పాత కమిటీపై కొంతమంది సభ్యుల్లో ఉన్న అసంతృప్తి ప్రభావం చూపిందన్న చర్చ ఎన్నికల అనంతరం వినిపిస్తోంది.
గతంలో కమిటీ పనితీరు, సభ్యత్వాల విషయంలో వచ్చిన ఆరోపణలు, సంస్థ నిర్వహణ తీరుపై వ్యక్తమైన అభిప్రాయాలు ఎన్నికల సమయంలో చర్చనీయాంశంగా మారాయి. అయితే వీటిపై సంబంధిత వర్గాల వివరణలు కూడా ఉండే అవకాశం ఉంది.
కమిటీ వ్యవహారాల్లో కొంతమంది వ్యక్తుల ఆధిపత్యం ఉందన్న అభిప్రాయాలు కూడా ఎన్నికల ప్రచారంలో వినిపించాయి. మరోవైపు బీసీ ప్రతినిధిత్వాన్ని ప్రధాన అంశంగా చేసుకుని కొందరు నేతలు కొత్త నినాదాన్ని ముందుకు తెచ్చారు. దీంతో స్వచ్ఛంద సంస్థ ఎన్నికలకు సామాజిక, రాజకీయ రంగు కూడా అద్దినట్లయింది.
అయితే చివరికి ఓటర్లు అభ్యర్థుల వారీగా తీర్పు ఇచ్చారు. ఈ ఎన్నికల్లో మరో కీలక అంశంగా సోషల్‌ మీడియా నిలిచింది. గతంలో పెద్దగా ప్రచారానికి అవకాశం లేని సొసైటీ ఎన్నికలు ఈసారి డిజిటల్‌ వేదికలపై విస్తృతంగా చర్చకు వచ్చాయి. కొత్త ప్యానల్‌ అభ్యర్థులు తమ ప్రచారాన్ని సామాజిక మాధ్యమాల ద్వారా సభ్యుల వద్దకు తీసుకెళ్లారు. దీంతో సొసైటీ వ్యవహారాలు పెద్ద సంఖ్యలో సభ్యుల దృష్టికి వెళ్లాయి.
కొత్త ప్యానల్‌ ఏర్పాటును తొలుత పెద్దగా పట్టించుకోకపోయినా.. ఎన్నికల నాటికి పోటీ తీవ్రత పెరిగింది. చివరకు ఫలితాల్లోనూ దాని ప్రభావం కనిపించింది. 15 స్థానాల్లో 11 చోట్ల కొత్త ప్యానల్‌ అభ్యర్థులు విజయం సాధించడం ఎన్నికల పోటీ ఎంత మారిపోయిందో స్పష్టం చేసింది.
నాలుగు స్థానాలకే పరిమితమైన పాత ప్యానల్‌గత కమిటీకి చెందిన ప్యానల్‌ నుంచి 14 మంది పోటీ చేయగా.. వారిలో నలుగురే మెజారిటీ ఓట్లు సాధించారు. దాదాపు ఏకగ్రీవ పద్ధతిలో కొనసాగిన పాత వ్యవస్థకు ఈ ఫలితం గట్టి పరీక్షగా మారింది. ప్రత్యక్ష ఎన్నికల్లో సభ్యుల ఓటు ఏ దిశలో ఉందో ఫలితాలు వెల్లడించాయి.
మొత్తంగా చూస్తే ఈ ఎన్నికలు కేవలం 15 మంది సభ్యుల ఎంపికకే పరిమితం కాలేదు. రెడ్‌క్రాస్‌ సొసైటీ నిర్వహణలో కొత్త ఆలోచనలు, కొత్త నాయకత్వం కోరుకుంటున్నారా? లేక పాత విధానాన్నే కొనసాగించాలనుకుంటున్నారా? అనే అంశంపై సభ్యుల అభిప్రాయం కూడా ఈ ఫలితాల్లో ప్రతిబింబించినట్లయింది.
మెజారిటీ ఓట్లు సాధించిన సభ్యులతో మేనేజ్‌మెంట్‌ కమిటీ ఏర్పాటు ప్రక్రియ సోమవారం (నేడు) కొనసాగనుంది. దీంతో ఇకపై కొత్త కమిటీ సంస్థను ఏ విధంగా నడిపిస్తుంది.. ఎన్నికల సమయంలో ఇచ్చిన హామీలను ఎలా అమలు చేస్తుంది.. సభ్యుల ఆకాంక్షలకు అనుగుణంగా ఎలాంటి నిర్ణయాలు తీసుకుంటుందనేది ఆసక్తికరంగా మారింది.
