తెలుగు లోగిళ్లలో సంక్రాంతి సంబరాలు మొదలయ్యాయి. ముక్కోటి దేవతల ఆశీస్సులతో, భోగభాగ్యాలను ప్రసాదించే ‘భోగి’ పండుగతో పల్లెలు, పట్టణాలు పండుగ కాంతులీనుతున్నాయి. పాతకు స్వస్తి పలుకుతూ, నూతనత్వానికి స్వాగతం పలికే ఈ పర్వదినం..
అటు ఆధ్యాత్మికతను, ఇటు సామాజిక ఐక్యతను చాటిచెబుతోంది. ఈ పర్వదినం కోసం జిల్లాలోని నగర వాసులు అన్ని ఏర్పాట్లు పూర్తి చేసుకున్నారు.సంక్రాంతి సంబరాల కోసం నగరంలోని ప్రధాన కూడళ్లు, అపార్ట్మెంట్ సముదాయాలు ముస్తాబయ్యాయి. ఉద్యోగ, వ్యాపార రీత్యా నగరాల్లో స్థిరపడిన వారు సైతం తమ సొంత ఊళ్లకు వెళ్లడమో లేదా ఉన్నచోటే సంప్రదాయబద్ధంగా జరుపుకోవడానికో సిద్ధమయ్యారు.
ఇప్పటికే మార్కెట్లు భోగి పళ్లు, పూలు, కొత్త బట్టల కొనుగోళ్లతో కిక్కిరిసిపోయాయి. కాలనీల్లోని ప్రజలంతా కలిసి ఉమ్మడిగా భోగి మంటలు వేసేందుకు ఏర్పాట్లు చేసుకున్నారు. సంక్రాంతికి ఒక రోజు ముందు వచ్చే భోగి పండుగ అంటేనే ఆనందాల హరివిల్లు. ‘భగ’ అనే పదం నుండి ఉద్భవించిన ఈ రోజున, సూర్యోదయానికి పూర్వమే అభ్యంగన స్నానాలు ఆచరించి ఇంటి ముందు భోగి మంటలు వేయడం ఆనవాయితీ.
కేవలం పాత వస్తువులనే కాకుండా, మనసులోని బద్ధకాన్ని, అశ్రద్ధను, చెడు తలంపులను కూడా ఆ మంటల్లో వేసి, కొత్త ఆశయాలతో ఉత్తరాయణ పుణ్యకాలంలోకి అడుగుపెట్టాలన్నదే ఈ మంటల వెనుక ఉన్న పరమార్థం.
ఆవుపేడ పిడకలు, మామిడి, రావి కొమ్మలతో వేసే ఈ మంటలు ప్రకృతితో మనిషికి ఉన్న అనుబంధాన్ని గుర్తుచేస్తాయి. భోగి రోజు సాయంత్రం ఇళ్లలో సందడి రెట్టింపు అవుతుంది. 12 ఏళ్లలోపు చిన్నారులను శ్రీమన్నారాయణుడి స్వరూపంగా భావించి, వారి తలపై భోగి పళ్లు పోయడం విశేషం.
సూర్యుడిని పోలిన గుండ్రని ఆకారం, ఎర్రటి రంగు కలిగిన రేగు పళ్లను (బదరీ ఫలం) చిన్నారుల తలపై పోయడం వల్ల సూర్యభగవానుడి ఆశీస్సులు లభిస్తాయి. పైభాగంలో ఉండే బ్రహ్మరంధ్రం ద్వారా ఈ ఫలాల స్పర్శ పిల్లల్లో జ్ఞానాన్ని, మేధస్సును పెంపొందిస్తుందని పెద్దల నమ్మకం.
చెరుకు గడలు, బంతి పూల రెక్కలు, నాణేలు కలిపిన ఈ మిశ్రమంతో దిష్టి తీయడం వల్ల చిన్నారులపై ఉన్న పీడలు తొలగిపోతాయని భక్తుల విశ్వాసం. ఇక ఇంట్లో ఆడపడుచులు బొమ్మల కొలువు తీర్చి, ముత్తైదువులను పిలిచి పేరంటం చేస్తారు.
దక్షిణాయనంలో పడ్డ కష్టాలను అగ్నిదేవుడికి సమర్పించి, రాబోయే కాలం సుఖసంతోషాలతో సాగాలని చేసే ఈ వేడుక ప్రతి ఇంటా సంతోషాన్ని నింపుతోంది.భోగి, సంక్రాంతి, కనుమ.. ఈ మూడు రోజుల వేడుక తెలుగువారి సంస్కృతికి అద్దం పడుతూ, కొత్త ఆనందాలను మోసుకొస్తోంది.
