- రెండు కూటముల మధ్య హోరాహోరీ పోరు..
- 1,894 మంది ఓటర్ల తీర్పుపై ఉత్కంఠ
- ఆరు డిపోలు, ఆర్‌ఎం కార్యాలయం పరిధిలో పోలింగ్‌.. రీజియన్‌, రాష్ట్ర స్థాయి గుర్తింపు సంఘాల కోసం వేర్వేరుగా ఓటు
దశాబ్ది కాలం సుదీర్ఘ విరామం తర్వాత జరుగుతున్న ఆర్టీసీ గుర్తింపు సంఘం ఎన్నికలు కార్మిక సంఘాల్లో వేడి పుట్టిస్తున్నాయి. రెండు ప్రధాన కూటములు హోరాహోరీగా తలపడుతుండటంతో ఉమ్మడి నిజామాబాద్‌ రీజియన్‌లో ఎన్నికల పోరు ఆసక్తికరంగా మారింది.
ఆరు డిపోలు, ప్రాంతీయ మేనేజరు కార్యాలయ పరిధిలోని 1,894 మంది ఉద్యోగులు నేడు వేసే ఓట్లు.. రీజియన్‌తోపాటు రాష్ట్రస్థాయిలో గుర్తింపు పొందే సంఘాల భవితవ్యాన్ని తేల్చనున్నాయి.
రెండు ప్రధాన కూటములు తమ బలాన్ని నిరూపించుకునేందుకు పోటాపోటీగా ప్రచారం సాగించడంతో ఎన్నికలపై ఉత్కంఠ నెలకొంది. రీజియన్‌ స్థాయిలో ఒకటి, రాష్ట్ర స్థాయిలో మరొకటి.. ఇలా ప్రతి ఉద్యోగి రెండు ఓట్లు వేయనున్నారు. ఉదయం 5 గంటల నుంచి సాయంత్రం 6 గంటల వరకు పోలింగ్‌ కొనసాగనుంది.
ప్రతి డిపోలో ప్రత్యేక పోలింగ్‌ కేంద్రాన్ని ఏర్పాటు చేశారు. పోలింగ్‌ ముగిసిన అనంతరం ఓట్ల లెక్కింపు చేపట్టి ఫలితాలను వెల్లడించనున్నారు. టీఎంయూ, ఆర్టీసీ ఎంప్లాయీస్‌ యూనియన్, ఎన్‌ఎంయూ ఒక కూటమిగా బరిలో నిలిచాయి.
థామస్‌రెడ్డి నేతృత్వంలోని ఈ వర్గం రీజియన్‌ స్థాయి గుర్తింపు కోసం నిచ్చెన గుర్తుపై పోటీ చేస్తోంది. మరోవైపు టీబ్ల్యూయూ, ఎస్‌డబ్ల్యూయూ, బీకేయూలతో కూడిన కూటమికి అశ్వత్థామరెడ్డి వర్గం నాయకత్వం వహిస్తోంది.
ఈ కూటమి బాణం గుర్తుపై పోటీ చేస్తుండగా, కాంగ్రెస్ అనుబంధ ఐఎన్‌టీయూసీ మద్దతు ఇస్తోంది. దీంతో రెండు వర్గాలు ఉద్యోగులను తమవైపు తిప్పుకునేందుకు ప్రయత్నించాయి. ఎన్నికల ప్రచారంలో కార్మిక సంఘాల నాయకుల మధ్య రాజకీయ సంప్రదింపులు కూడా ప్రాధాన్యం సంతరించుకున్నాయి.
డిపోల వారీగా ఓటర్లు
ఆర్మూర్ డిపోలో 268 మంది, బాన్సువాడలో 315, బోధన్‌లో 345, కామారెడ్డిలో 400, నిజామాబాద్‌-1లో 356, నిజామాబాద్‌-2లో 174 మంది ఓటర్లు ఉన్నారు. ప్రాంతీయ మేనేజరు కార్యాలయం పరిధిలో మరో 36 మంది ఓటు వేయనున్నారు.
మొత్తం 1,894 మంది ఓటర్లు రెండు కూటముల భవితవ్యాన్ని నిర్ణయించనున్నారు. పోలింగ్‌ సరళి, ఓట్ల లెక్కింపుపై కార్మిక సంఘాల నాయకులు ఆసక్తిగా ఎదురుచూస్తున్నారు.
కార్మికుల సమస్యలు తీర్చే సంఘానికే పట్టం..
- మధు ఆర్టీసీ యూనియన్ నాయకులు..
“దాదాపు పదేళ్ల సుదీర్ఘ విరామం తర్వాత జరుగుతున్న ఆర్టీసీ గుర్తింపు సంఘం ఎన్నికల్లో కార్మిక వర్గం చైతన్యవంతంగా తన ఓటు హక్కును వినియోగించుకుంటోంది. తమ సమస్యలను అర్థం చేసుకుని, వాటి పరిష్కారం కోసం నిరంతరం పోరాడే యూనియన్‌ను ఎన్నుకోవాలనే స్పష్టమైన ఆలోచనతో ఉద్యోగులు ఓటు వేస్తున్నారు. - వేతనాలు, ఉద్యోగుల సంక్షేమం, పని పరిస్థితులు, ఇతర కార్మిక సమస్యలపై గళమెత్తి, యాజమాన్యం దృష్టికి సమస్యలను తీసుకెళ్లి పరిష్కారం సాధించే నాయకత్వం కావాలని కార్మికులు కోరుకుంటున్నారు.
- కేవలం ఎన్నికల సమయంలోనే కాకుండా, కార్మికులకు కష్టం వచ్చిన ప్రతిసారీ అండగా నిలిచే సంఘానికే ఉద్యోగులు ఆదరణ చూపుతున్నారు. కార్మికుల ఆకాంక్షలకు అనుగుణంగా పనిచేసి, వారి సమస్యల పరిష్కారానికి కృషి చేసే యూనియన్‌ను ఎన్నుకోవడమే ఈ ఎన్నికల ప్రధాన ఉద్దేశం.”
ఈసారి నాయకత్వంలో మార్పు వస్తుందనే ఆశ ఉంది.. ఆర్టీసీ డ్రైవర్ అశోక్
“చాలా సంవత్సరాల సుదీర్ఘ విరామం తర్వాత ఆర్టీసీలో గుర్తింపు సంఘం ఎన్నికలు జరుగుతున్నాయి. ఈ ఎన్నికలపై కార్మికుల్లో ఎన్నో ఆశలు, ఆకాంక్షలు ఉన్నాయి. ఈసారి ఎన్నికల్లో వచ్చే నాయకత్వం కార్మికుల సమస్యలపై మరింత దృష్టి సారిస్తుందని, ఉద్యోగుల ఇబ్బందులను అర్థం చేసుకుని పరిష్కారానికి కృషి చేస్తుందని ఆశిస్తున్నాం.
ఇప్పటివరకు ఎదురైన సమస్యలకు పరిష్కారం లభించాలంటే నాయకత్వంలో మార్పుతోపాటు కార్మికుల పక్షాన నిలిచే విధానం రావాలి. కొత్తగా ఎన్నికయ్యే నాయకులు కార్మికుల నమ్మకాన్ని నిలబెట్టుకుని, వారి హక్కుల సాధనకు కృషి చేస్తారని భావిస్తున్నాం” అని ఆర్టీసీ డ్రైవర్ అశోక్ తెలిపారు.
