.. దోపిడీల ద్వారా సులభంగా డబ్బు సంపాదించాలనే లక్ష్యంతో నాటు తుపాకులతో తిరుగుతున్న ఇద్దరు అంతర్రాష్ట్ర నేరగాళ్లను నగర పోలీసుల బృందం అదుపులోకి తీసుకుంది.
కమిషనర్స్ టాస్క్ ఫోర్స్ (జూబ్లీహిల్స్ జోన్), మైలార్దేవ్పల్లి పోలీసులు సంయుక్తంగా జరిపిన ఆపరేషన్లో ఈ ముఠా గుట్టు రట్టయింది.ఈ మేరకు హైదరాబాద్ కమిషనర్స్ టాస్క్ ఫోర్స్ డిప్యూటీ కమిషనర్ ఆఫ్ పోలీస్ గైక్వాడ్ వైభవ్ రఘునాథ్ వివరాలు వెల్లడించారు.
మైలార్దేవ్పల్లి పరిధిలో ఒక బెలేనో కారు లో ఆయుధాలతో కొందరు గుర్తుతెలియని వ్యక్తులు అనుమానాస్పదంగా సంచరిస్తూ, ఏదైనా పెద్ద నేరానికి పాల్పడేందుకు సిద్ధమవుతున్నారన్న నమ్మదగిన సమాచారం పోలీసులకు అందింది.
వెంటనే స్పందించిన టాస్క్ ఫోర్స్, మైలార్దేవ్పల్లి పోలీసులు ‘మెహఫిల్ హోటల్’ సమీపంలో సదరు కారును అడ్డుకున్నారు. సోదాలు చేయగా, నిందితుల వద్ద ఆయుధాలు బయటపడ్డాయి. వీరిని ముదస్సిర్ హుస్సేన్ అలియాస్ షా బాబా (24), అమీర్ ఖాన్ (26)గా గుర్తించారు.
ముదస్సిర్ హుస్సేన్ (24): ఖిల్వత్, చార్మినార్ వాసి. గతంలో కార్ల వ్యాపారం చేసే క్రమంలో ఇతడికి మహారాష్ట్ర నేరగాడు సూరజ్ సింగ్తో పరిచయమైంది.
ఆ పరిచయంతో కర్ణాటకలో దోపిడీకి, మహారాష్ట్రలో వ్యాపారవేత్త కిడ్నాప్ కేసులో పాల్గొని జైలుకు వెళ్లాడు. జైలు నుండి విడుదలయ్యే సమయంలో ఒక పిస్టల్, బుల్లెట్లను తీసుకున్నాడు. ఆర్థిక ఇబ్బందుల నేపథ్యంలో దోపిడీలకు ప్లాన్ చేశాడు.
అమీర్ ఖాన్ (26): నాందేడ్, మహారాష్ట్ర వాసి. లారీ డ్రైవర్గా పనిచేస్తూ నేరాల్లో భాగస్వామి అయ్యాడు.నిందితులపై పలు రాష్ట్రాల్లో కేసులు ఉన్నాయి.ముదస్సిర్: బసవకల్యాణ (కర్ణాటక), అఖాడా బాలాపూర్ (మహారాష్ట్ర) పోలీస్ స్టేషన్లలో ఆయుధ చట్టం మరియు ఇతర సెక్షన్ల కింద కేసులు ఉన్నాయి.
అమీర్ ఖాన్:వజీరాబాద్ (నాందేడ్)లో హత్య కేసుతో పాటు, తెలంగాణలోని మొయినాబాద్ పోలీస్ స్టేషన్లో కేసు నమోదై ఉంది. వీరి నుంచి 2 నాటు తుపాకులు (పిస్టల్స్), 7 సజీవ బుల్లెట్లు, బెలేనో కారు, 3 మొబైల్ ఫోన్లు, మొత్తంగా రూ. 5,00,000 విలువైన సొత్తును స్వాధీనం చేసుకున్నారు.
ఈ ఆపరేషన్లో టాస్క్ ఫోర్స్ జూబ్లీహిల్స్ జోన్ ఇన్స్పెక్టర్ సిహెచ్. యాదందర్, ఎస్ఐ మహమ్మద్ జాహెద్, టాస్క్ ఫోర్స్ సిబ్బంది, మైలార్దేవ్పల్లి పోలీసు బృందం పాల్గొన్నారు.
