వనపర్తి జిల్లా పెబ్బేరులో ఘటన.. వైరల్‌ ఫీవర్‌ అంటూ చెప్పినట్లు సమాచారం
హాస్టల్‌లో భోజనం చేసిన విద్యార్థినులు ఒక్కసారిగా అస్వస్థతకు గురైన ఘటన వనపర్తి జిల్లాలో కలకలం రేపింది. పెబ్బేరు పట్టణ శివారులోని మహిళా పాలిటెక్నిక్‌ కళాశాల వసతిగృహంలో బుధవారం రాత్రి భోజనం చేసిన సుమారు 40 నుంచి 50 మంది విద్యార్థినులు తీవ్ర ఇబ్బందులకు గురయ్యారు.
భోజనంలో చికెన్‌ తిన్న తర్వాత కడుపునొప్పి, ఇతర అనారోగ్య లక్షణాలు కనిపించడంతో కొందరు విద్యార్థినులు నొప్పి తట్టుకోలేక కన్నీళ్లు పెట్టుకున్నట్లు తెలిసింది.విద్యార్థినులు అస్వస్థతకు గురైన విషయం తెలుసుకున్న హాస్టల్‌ సిబ్బంది వారిని చికిత్స నిమిత్తం ఆస్పత్రికి తరలించారు. ఘటనకు గల కారణాలపై స్పష్టత రావాల్సి ఉంది. ఆహారం కలుషితం కావడం వల్లే ఈ పరిస్థితి తలెత్తిందా అనే కోణంలో పరిశీలించాల్సి ఉంది.
విద్యార్థినుల ఆరోగ్య పరిస్థితి, వారికి అందించిన చికిత్సపై కళాశాల యాజమాన్యం అధికారికంగా వివరాలు వెల్లడించాల్సి ఉంది.విద్యార్థినులు అస్వస్థతకు గురైన ఘటనకు సంబంధించిన దృశ్యాలు బయటకు రాకుండా కొందరు ప్రయత్నించినట్లు ప్రచారం జరుగుతోంది.
విద్యార్థినులకు వైరల్‌ ఫీవర్‌ వచ్చిందని చెప్పి అసలు కారణాన్ని పక్కదారి పట్టిస్తున్నారనే ఆరోపణలూ వినిపిస్తున్నాయి. అయితే ఈ ఆరోపణలపై అధికారిక నిర్ధారణ లేదు. ఘటనపై సంబంధిత అధికారులు విచారణ జరిపి వాస్తవాలను వెల్లడించాలని విద్యార్థినుల తల్లిదండ్రులు కోరుతున్నారు.
