మద్యం తాగి వాహనం నడిపేవారిపై పోలీసులు కొరడా ఝళిపిస్తున్నా.. తనిఖీల నిర్వహణ తీరుపై ప్రశ్నలు తలెత్తుతున్నాయి. నిజామాబాద్ పోలీస్ కమిషనరేట్ పరిధిలో డ్రంక్ అండ్ డ్రైవ్ తనిఖీలు తరచూ ఒకే ప్రాంతంలో నిర్వహిస్తుండటంతో.. మందుబాబులు ముందుగానే అప్రమత్తమై ప్రత్యామ్నాయ మార్గాలు వెతుక్కుంటున్నారనే అభిప్రాయాలు వ్యక్తమవుతున్నాయి.
దీంతో తనిఖీలు జరుగుతున్న చోట పట్టుబడుతున్నవారితోపాటు, పోలీసుల కంటపడకుండా పక్కదారుల్లో వెళ్లిపోతున్నవారిపై నిఘా ఎంతమేరకు ఉంటుందన్నది చర్చనీయాంశంగా మారింది. మద్యం సేవించి వాహనం నడపకుండా అడ్డుకోవడం, ప్రమాదాలను నివారించడం లక్ష్యంగా పోలీసులు నిత్యం డ్రంక్ అండ్ డ్రైవ్ తనిఖీలు నిర్వహిస్తున్నారు.
ముఖ్యంగా వారాంతాల్లో విస్తృతంగా తనిఖీలు చేపడుతున్నారు. ప్రతి వారం సుమారు వందకుపైగా వాహనదారులు పట్టుబడుతున్నట్లు తెలుస్తోంది. అయినప్పటికీ మద్యం సేవించి వాహనం నడిపే వారి సంఖ్య తగ్గడం లేదు.
డ్రంక్ అండ్ డ్రైవ్ తనిఖీలకు ఒకే ప్రాంతాన్ని పదేపదే ఎంపిక చేస్తుండటంతో ఆ విషయం వాహనదారులకు తెలిసిపోతోందనే విమర్శలు వస్తున్నాయి. ముఖ్యంగా మద్యం సేవించి వాహనం నడిపే కొందరు తనిఖీలు జరిగే ప్రాంతానికి చేరుకోకముందే దారి మళ్లుతున్నట్లు తెలుస్తోంది.
ప్రధాన రహదారులను వదిలి పక్క వీధులు, చిన్న రహదారులు, ఇతర మార్గాలను ఎంచుకుంటున్నారు. దీంతో ఒక ప్రాంతంలో తనిఖీలు ముమ్మరం చేసినా.. మరో మార్గంలో మద్యం సేవించిన వాహనదారులు వెళ్లే అవకాశం ఉంటోంది.
పోలీసులు నిర్వహిస్తున్న తనిఖీల్లో ప్రతి వారం వందకుపైగా డ్రంక్ అండ్ డ్రైవ్ కేసులు నమోదవుతున్నాయి. మద్యం సేవించి వాహనం నడుపుతూ పట్టుబడిన వారికి జరిమానాలతోపాటు న్యాయస్థానం ద్వారా శిక్షలు విధిస్తున్నారు. పునరావృతంగా పట్టుబడితే మరింత కఠిన చర్యలు ఎదురవుతున్నాయి.
జైలు శిక్ష పడుతున్న సందర్భాలూ ఉన్నాయి. అయినప్పటికీ కొందరు వాహనదారుల్లో మార్పు రావడం లేదు. మొదటిసారి పట్టుబడిన వారికి జరిమానా, మళ్లీ అదే తప్పు చేస్తే అధిక జరిమానా, పునరావృతమైతే జైలు శిక్ష వంటి చర్యలు ఉన్నప్పటికీ మందుబాబుల తీరు మారకపోవడం ఆందోళన కలిగిస్తోంది.
ముఖ్యంగా మద్యం సేవించిన తర్వాత వాహనం నడపడం వల్ల ప్రమాదాలు జరిగి ప్రాణాలు పోయే అవకాశం ఉన్నా.. కొందరు మాత్రం నిబంధనలను పట్టించుకోవడం లేదు. ఒకే ప్రాంతంలో తనిఖీలు నిర్వహించడం వల్ల వాహనదారులు అప్రమత్తమయ్యే అవకాశం ఉన్న నేపథ్యంలో తనిఖీల ప్రాంతాలను తరచూ మార్చాల్సిన అవసరం ఉందనే అభిప్రాయాలు వ్యక్తమవుతున్నాయి.
ప్రధాన రహదారులతోపాటు శివారు ప్రాంతాలు, బైపాస్లు, ప్రత్యామ్నాయ మార్గాల్లోనూ ఆకస్మిక తనిఖీలు చేపడితే మరింత మందిపై నిఘా పెట్టే అవకాశం ఉంటుంది. తనిఖీల సమయం, ప్రాంతాన్ని మార్చుతూ ఆకస్మికంగా చేపట్టడం ద్వారా మద్యం సేవించి వాహనం నడిపేవారికి తప్పించుకునే అవకాశం తగ్గుతుంది.
డ్రంక్ అండ్ డ్రైవ్పై పోలీసులు కఠినంగా వ్యవహరిస్తున్నా.. తనిఖీల ప్రాంతం ముందుగానే తెలిసిపోయే పరిస్థితి ఉంటే అసలు లక్ష్యం నెరవేరుతుందా? ఒకే ప్రాంతంలో తనిఖీలకు బదులుగా ప్రాంతాలు మారుస్తూ ఆకస్మిక తనిఖీలు చేపట్టేలా పోలీసు శాఖ వ్యూహం మార్చుతుందా అన్నది ఇప్పుడు చర్చనీయాంశంగా మారింది.
