ఎంపీ గా నిజామాబాద్ నుంచి రెండో సారి విజయం సాధించిన అర్వింద్ కు మోడీ క్యాబినెట్ లో బెర్త్ ఖాయమనే ధీమా కమలనాథుల్లో వ్యక్తం అవుతుంది. కానీ కేంద్ర ప్రభుత్వంలోకి టీడీపీ కూడా భాగస్వామ్యం కావడంతో తెలంగాణ లో బీజేపీ ఎంపీ లకు మంత్రి అవకాశాలకు గండి పడేలా ఉంది. ప్రధాని గా మూడో సారి బాధ్యతలు చేపట్టబోతున్నారు. కానీ బీజేపీ కి స్వతహాగా అధికారం చేపట్టే పరిస్థితి లేదు.
అందుకే మోడీ మొదటి సారిగా సంకీర్ణ సర్కార్ ను ఏర్పాటు చేయబోతున్నారు. అందులోనూ టీడీపీ కీలక పాత్ర పోషించే అవకాశం ఉంది. దీనితో మంత్రి పదవులకేటాయింపు లో తెలుగు రాష్ట్రాల్లో ఏపీ కి ఎక్కువగా ప్రాధాన్యత దక్కబోతోంది.
అందులోనూ మిత్ర పక్షాల కు మంత్రి పదవులు సర్దుబాటు చేయక తప్పదు. నిజానికి తెలంగాణలో ఈసారి మోడీ మానియా బాగా పనిచేసింది. అందుకే బీజేపీ ఏకంగా ఎనిమిది ఎంపీ లను గెలిచింది. వచ్చే అసెంబ్లీ ఎన్నికల్లో అధికారం లక్ష్యంగా ఈసారి మోడీ క్యాబినెట్ లో కనీసం ముగ్గురికి స్థానం ఇస్తారని విస్తృతంగా ప్రచారం జరిగింది.
గెలిచినా ఎనిమిది మంది లో ముగ్గురు బిసి ల్లో ఇద్దరికి మంత్రి పదవులు దక్కుతాయని భావించారు. ఇందులో మల్కాజిగిరి ఎంపీ ఈటల రాజేందర్ తో పాటు నిజామాబాద్ ఎంపీ ధర్మపురి అర్వింద్ పేర్లు ఫలితాలకు ముందే తెరమీదికి వచ్చాయి.
కానీ బీజేపీ మెజార్టీ సీట్లు సాధించలేక మిత్ర పక్షాల మద్దతూ అనివార్యం అయింది. అందుకే తెలంగాణ కు ఇదివరకు అంచనాల మేరకు మంత్రి పదవులు రాకపోవచ్చనే చర్చ మొదలయ్యింది. కానీ తెలంగాణ లో బీజేపీ ప్రభంజనం వచ్చిన నేపథ్యంలో కనీసం రెండు మంత్రి పదవులు ఇవ్వాలనే డిమాండ్ కమలనాథుల్లో ఉంది.
రెండు మంత్రి పదవులు కేటాయిస్తేనే అర్వింద్ కు ఖచ్చితంగా అవకాశాలుంటాయని అర్వింద్ సన్నిహితులఆశాభావం తో ఉన్నారు.గెలిచినఎంపీ ల్లో మోడీ ,అమిత్ షా లకు అత్యంత సన్నిహితంగా ఉండే అర్వింద్ మంత్రి అవకాశాలను ఎవరు కొట్టిపారేయడం లేదు.
అందులోనూ నిజామాబాద్ జిల్లాకు ఇప్పటిదాకా కేంద్ర మంత్రి మండలి లో ప్రాతినిధ్యమే దక్కలేదు. ఉత్తర తెలంగాణలో నిజామాబాద్ జిల్లాకు మాత్రమే ఇప్పటిదాకా మంత్రి పదవీ దక్కలేదు. అందుకే ఈసారి ఎంపీ ఎన్నికలో విజేతలెవ్వరైనా సరే మంత్రి అవ్వడం ఖాయమనే చర్చ ప్రధాన పార్టీల్లో జోరుగా సాగింది.
ఈసారి అయినా కేంద్ర క్యాబినెట్ లో జిల్లాకు బెర్త్ దక్కాలనే డిమాండ్ మొదలయ్యింది. లోకసభ ఎన్నికల పక్రియ మొదలై ఏడు దశాబ్దాలు అయింది.18 పర్యాయాలు ఎన్నికలు నిర్వహించారు. తొమ్మిది మంది దిగ్గజ నేతలే ఎంపీ గా పనిచేసారు.
అందులోనూ ముగ్గురు నేతలు హ్యాట్రిక్‌ సాధించారు .ఈ స్థానానికి మొత్తం 18 సారి ఎన్నికలు జరిగాయి. తొలి ఎంపీగా విజయం సాధించిన హరీశ్‌చంద్ర హెడా మూడుసార్లు ఎంపీగా ఎంపికై రికార్డును సృష్టించారు. 1952, 1957,1962లలో పార్లమెంట్‌ ఎన్నికలు జరుగగా హరీశ్‌చంద్ర హెడా వరుసగా ఎంపీగా గెలుపొందారు.
ఆయన కు నెహ్రు తో సన్నిహిత సంబంధాలే వుండేవి. కానీ మంత్రి ఛాన్స్ మాత్రం దక్కలేదు. ఎం.రాంగోపాల్‌రెడ్డి 1971, 1977, 1980లలో వరుసగా విజయంసాధించినా ఆయనకు మంత్రి ఇవ్వలేదు . 1991లో కేశ్‌పల్లి గంగారెడ్డి ఎంపీగా విజయం సాధించారు. ఈయన 1998, 1999లలో కూడా ఎంపీగా గెలుపొంది హ్యాట్రిక్‌ ఎంపీగా తన స్థానాన్ని పదిలం చేసుకున్నారు.
హ్యాట్రిక్‌ సాధించిన ఎంపీలలో ఇద్దరు కాంగ్రెస్ పార్టీకి చెందిన వారు కాగా కేశ్‌పల్లి గంగారెడ్డి టీడీపీ తరపున బరిలో నిలిచి ఎంపీ అయ్యారు. అయితే పీవీ హయాంలో తిరుగుబాటు చేసి కాంగ్రెస్ లోకి వెళ్లిన అయన మంత్రి అవుతారని విసృతంగా ప్రచారం జరిగింది. వరుసగా రెండో సారి ఎంపీ గా గెల్చిన మధు యాష్కీ సైతం అవకాశం వచ్చినట్లే వచ్చి చేజారింది.
తెలంగాణ ఉద్యమ కాలం లో కెసిఆర్ స్థానంలో యాష్కీ కి కేంద్ర క్యాబినెట్ లో తీసుకుంటారని భావించారు.అలాగే తెరాస నుంచి ఎంపీ గా గెల్చిన కవిత సైతం మోడీ క్యాబినెట్ లో చేరబోతున్నారంటూ ఆమె సన్నిహితులు అనేక సార్లు ఊదరగొట్టారు.
చివరికి తుస్సుమనిపించారు. కానీ ఈసారి నిజామాబాద్ లోకసభ ఎన్నికల బరిలోకి దిగిన కాంగ్రెస్ బీజేపీ అభ్యర్థుల్లో ఎవరూ గెలిచినా కేంద్ర మంత్రి అవుతారని మొదటి నుంచి ఎన్నికల ప్రచారంలో క్యాడర్ పనిగట్టుకొని ప్రచారం చేసారు.
కేంద్రంలో మూడో సారి మోడీ వస్తారని అర్వింద్ రెండో సారి గెలిస్తే మోడీ క్యాబినెట్ లో బెర్ట్ దక్కుతుందని కాషాయ శ్రేణులు ఎన్నికల ప్రచారంలోనే ధీమా గా చెప్పాయి .అనేక ప్రతికూల పరిస్థితులను అధిగమించి అర్వింద్ ఎన్నికల్లో గెలుపు సొంత చేసుకున్నారు.
గతంలో కన్నా ఎక్కువగానే మెజార్టీ సాధించడం గమనార్హం. నిజానికి అర్వింద్ ఈసారి గెలిస్తే మంత్రి అవుతారని రాజకీయాల్లో అరుదైన ఘనత సాధిస్తారనే ఈర్ష్య తోనే కొందరు కాంగ్రెస్ నేతలు అర్వింద్ కు ఓటమికి కోసం సర్వశక్తులు ఒడ్డారు.
